• 季節
  • 主題渡假
  • 天數td-demo-header-menu
  • 人数個人
  • 文章性質遊記
  • 人均消費

喜歡櫻花, 每年愛看一遍. 鍾意櫻花既朋友, 一定黎過或者聽過河津櫻河津櫻雖然係櫻花既一種, 不過通常都係指位於河津呢個地方既櫻花. 河津櫻之所以出名, 因為河津櫻係沿住條河兩旁咁生長, 所以大家成日睇相都會見到一條河, 兩邊係粉紅色既櫻花啲咁既相片, 其實就係河津呢度拍架喇. 另外, 一般東京都既櫻花都係每年三月尾四月頭開花既. 而河津呢度嘅櫻花就係每年二月中至三月中就會開花. 所以每年呢個時候河津都有一個叫做河津櫻花祭嘅活動, 全個地區一共有八千棵櫻花一齊開放, 沿住河津川延綿3公里長!!

今年咁岩3月頭去日本, 諗住趕得切河津櫻既尾班車, 於是就飛車趕落去…….

河津櫻歡迎我!!!!!

一如以往既文章, 第一件事, 睇地圖先!

雖然個地圖有一點寫住河津櫻, 但係唔使理. 一般黎講河津櫻係凡指河津川兩旁既櫻花. 簡單啲嚟講即係由河津站來回峰溫泉大噴湯公園之間嘅一段路. 雖然只係一條大直路咁簡單, 但係一個單程都要行你一個半鐘, 一來一回影下相行下睇下野, 預番三個鐘無走雞. 所以除非你係喺附近 (伊豆, 熱海等) 住溫泉酒店. 否則要預時間即日來回. 因為出東京既尾班車係15:18, 呢班仲要係旺季加班車黎. 所以你要12點前入到黎河津, 否則影幾張相就夠鐘要走.

峰溫泉大噴湯公園

 

 

 

峰溫泉大噴湯公園係呢度既一大景點, 當中最好睇既當然係大噴湯三隻字, 呢度免費入場, 仲有免費停車場, 唯一要留意就係呢度逢星期二五休息……

 

 

 

 

 

聞說熱辣辣既溫泉水長期喺地底流動, 壓力會越黎越大. 所以就有大噴湯呢個習俗. 呢度每日有七場大噴湯表演 (由朝早09:30開始, 每一個鐘一場). 無去過或者唔想浪費時間既朋友, 我拍左片比你睇.

除左睇大噴湯之外, 仲有溫泉蛋賣.

 

 

 

河津櫻

睇完大噴湯, 沿路行番出去河邊, 就可以慢慢賞櫻喇. (以下既相片係由大噴湯開始沿河邊出番去火車站方向的)

 

 

 

 

 

 

 

 

 

 

唉, 雖然今年既河津祭係2月10日至3月10日舉行, 但係我3月9日去到, 已經係得番幾棵櫻花樹咋!! 所以下面既相片係後期加工效果, 等你知道原本應該有幾靚.

無乜櫻花, 都要繼續行, 仲有河津櫻花祭嘛.

 

有櫻花既話, 呢度影相係勁靚的.

 

 

 

 

 

 

呢條河有幾個呢啲落樓梯位, 可以喺潮退時落到去河面度行下同影下相. 提大家一句, 河津係合法航拍既地方, 所以玩航拍既朋友歡迎喺呢度放機. 由於當日太大風, 我部Xplorer Mini頂唔順, 所以我無飛到. (就算有都無櫻花, 還是算了吧)

 

沿住河邊行, 廁所唔係好多, 呢度係其中一個, 下一個廁所要去到笹原公園先有, 再之後要去到火車站附近先有架喇.

 

仲諗住行下祭, 點知無櫻花, 連檔都收埋…… 再直行.

 

 

 

 

皇天不負有心人, 終於比我搵到檔口仔喇.

 

 

 

呢個好食, 櫻花皮, 入面係甜的.

 

櫻花雪榚係呢度必食既野!! 一定要試. 由於當日好多檔都無開, 所以行左幾間先有得賣, 好快就賣晒!!

又繼續行……

 

 

 

笹原公園呢度, 有個免費既足湯, 溫泉水黎架. 不過我無毛巾又著波鞋, 所以影張相就算. 不過啲大媽浸得好Happy.

 

 

 

 

 

 

 

 

 

 

見到條火車橋即係差唔多返到起點.

 

 

 

 

穿過呢條步行者天國, 就到達河津火車站. 見仲有時間, 向大海方向行下先.

 

 

 

 

 

 

夠鐘要走喇, 去月台等車兼影下火車!!

 

 

 

從上面既相片中可以睇到, 河津站既兩邊都係單軌行車, 得月台範圍係雙軌, 所以大部份班次都會見到兩班車一齊到站既景象. 而我影既呢部車叫做踊子號, 賣少見少架喇. 好似話2018年開始會逐步退役, 所以想坐既要襯早.

交通指南

黎得河津九成九都係用JR EAST PASS, 所以簡單講, 你可以由新宿或者東京伊豆急行線直達河津, 車程2小時35分鐘. 搭咁長途車梗係要揀車坐啦, 呢條線除左我上面講左既踊子號之外, 仲有新版特急車叫超景踊子號. (可能大家喺東京成日都見到但係唔知係咩黎)

 

 

車頭車尾雙層既車卡係頭等, PASS唔坐得的. 其餘既車卡都係指定席, 所以出發前記得去JR客戶中心劃左位先. 叫得超景, 佢既車窗真係好大!!! 大到朝早出發其實有啲曬, 搞到個個都拉埋晒簾. 不過我一於少理, 開大個窗影相, 因為沿住個相模灣行, 不知幾靚.

 

 

 

 

 

 

 

 

最後比個Tips大家, 如果你想任影櫻花唔會有人阻既話, 有咁遠去咁遠就會少人啲. 笹原公園嗰邊近火車站既就會超多人.
分享
1 Star2 Stars3 Stars4 Stars5 Stars (No Ratings Yet)
Loading...
下一篇文章白糸の滝 (白絲瀑布)