• 季節
  • 主題渡假
  • 天數td-demo-header-menu
  • 人数個人
  • 文章性質遊記
  • 人均消費

白糸の滝 (白絲瀑布)

白絲瀑布, 係輕井澤一大景點, 白絲瀑布最特別既地方, 唔係佢有幾高, 而係佢有幾闊. 呢個瀑布真係闊到用全景360都拍唔晒, 所以先至有咁多人慕名而黎. 而由輕井澤前往白絲瀑布, 係一定要搭巴士黎的(自駕就梗係乜都得啦), 但係踩單車係黎唔到, 因為白絲瀑布位於高山上面, 而山路係禁止踩單車的. 不過交通指南留番最後先講, 我地由落車站講起……

輕井澤出發, 搭巴士約30分鐘車程就到呢度. 呢度竟然有免費WiFi, 不過唔駛驚, 呢度電話係收到爆的. 巴士站其實就係喺一間手信鋪門口, 旁邊仲有間烤魚店, 同埋厠所. 好喇, 真係去瀑布喇……

其實行上黎就好近, 5分鐘內就行到, 不過冬天條路結晒冰. 沿路滑得好緊要, 小心為上, 慢慢行呀.

白絲瀑布真係唔係好高, 大約兩個成年人咁高而已, 但係就真係好闊同埋好齊頭, 所以睇落好似一幅白布咁. 睇相睇唔出既, 睇片吧!

離開既時候, 喺你落車既巴士站對面就有以下呢個巴士站牌, 喺呢度等車就可以出返輕井澤. 襯有時間, 行多陣先.

呢度有個唔太大既停車場, 就喺正話介紹過既手信鋪旁邊.
筆者去既時候, 咁岩有LED冰柱展覽, 可惜要夜晚先影到, 否則好似下圖咁, 乜都係白色.

為左等車既旅客, 呢度仲有個暖氣候車室添.

交通指南

一開頭同大家講過, 想去白絲瀑布就一定要搭巴士. 由輕井澤北口出, 2號月台就係.
其實去白絲瀑布, 即係搭去草津溫泉同一條巴士線. 車程約30分鐘, 收費¥710. 又提多次, 雖然日本既巴士係設有找讀, 但係¥5000同¥10000係唔收架. 記得唱定散紙上車.
大家見到, 每日有七班車, 除左最尾一班15:40係有去無回之外, 其餘班次當你去到白絲瀑布之後, 都有大約30-50分鐘時間比你慢慢行, 就算係相隔30分鐘嗰段, 都足夠你行同影相有餘. 不過安全計, 當你落左車之後, 記得去回程個巴士站牌度睇定回程個時間表先(見下圖), 唔好錯過左回程既班次呀! 喺雪山上面等多個拎鐘凍都凍死你.
最後, 提提自駕遊既朋友, 筆者喺草津溫泉篇已經提醒過, 由輕井澤前往草津溫泉係會經過一段收費既山路, 所以非必要都唔好由輕井澤自駕去草津. 而呢段山路就係白絲瀑布呢段喇, 呢段路又窄又斜仲要好多急彎, 加上冬天路面會積雪, 好難渣, 所以單車係禁止上山的. 唔信? 我拍埋片比你睇.