• 季節
  • 主題深度遊
  • 天數td-demo-header-menu
  • 人数個人
  • 文章性質遊記
  • 人均消費
我哋成個行程都好Free Style,唔會特別plan 去邊,沿途見步行步,留幾耐都係去到再決定! 係札門烏德個陣因為太得閒我哋已經搵到住宿嘅地方!
呢間野價錢尚算實惠,4人房都係32蚊美金一晚,人均8蚊美金有獨立廁所、有兩個假露台,一個開唔到,一個開左只係行得一半。呢度都幾多外國人黎,再加上語言不通,引申左好多搵笨柒嘅Service,例如 Hostel Offer火車站接收 8蚊美金,大約十分鐘車程。打的只係需要5000蚊蒙古幣(大約17蚊港幣),差唔多有4倍之差。原來低處未算低,後黎我哋再坐出去買車飛只係需要4000蚊蒙古幣。到埗後,因為間房未準備好,先黎食個免費早餐,有大量麵包,有牛油、果Jam、咖啡奶茶無限量供應! 食完要自己執返手尾,我哋會係呢邊留兩日就真真正正坐西伯利亞鐵路上俄羅斯,點解要咁轉接又要經二連又要經蒙古,因為窮囉!
拎到房第一時間緊係要沖涼喇,兩日無沖周身唔舒服!大家沖完涼都只係朝早11點幾,時間過得好似好漫長咁!Hea 下 Hea 下差唔多成13點30先出去搵食,我哋附近有間好大嘅商場,入面有得換錢,匯率同係入境個陣差唔多,差一蚊兩蚊,食埋個晏就去Supermarket 掃貨!
係間Department Store嘅周圍都好多餐廳,唔知點解特別多韓國野!韓流文化真係影響深遠,毒到黎蒙古 (So Sad) 。亂入左間蒙古餐廳,叫完坐左起碼10分鐘,先同我講無曬牛,我對羊無乜情意結,特別係佢個陣騷味,我唯有敗走轉戰其他餐廳,其他人繼續享受蒙古羊,附近嘅餐館價錢比起係札門貴啲,起碼都40-50蚊港幣一條友,可能因為近百貨公司附近掛。呢邊啲人食肉唔食菜,都唔知平時點放貨!千挑萬選左一間有沙津食嘅餐廳,意粉13000、沙津半份6000,本來諗住唔飲野,因為水都要3000,最後選擇左最平嘅七喜 1500。 Total 20500蒙古幣大約70蚊港紙,一菜難求呀,為左可以放貨,比佢喇。
Supermarket 係去到每一到必需要去嘅地方,一來補給,二黎可以搵到啲當地古靈精怪嘅野食!蒙古嘅超級市場好多來佬貨賣,特別當韓國野!生活必需品通通都可以係呢度搵到,為左往後幾日放貨系統暢通無阻,水果係必需品,但呢度啲水果以零售價買唔算平,如果你買到3斤就經濟好多喇,批發價黎!提子、香蕉、雪梨都唔錯,就我個人黎講酸奶係排便神器首位(只限於大陸地區)!
佢呢度有啲唔知係豆花、酸奶定芝士咁嘅物品,無遮無掩白色一大筒就咁放左係平時百佳惠康果啲無蓋雪櫃內!有勇士試完都唔知乜黎! 我哋會係烏蘭巴托停留兩晚,其中兩個會去國家公園騎馬、住蒙古包同係草原睇星星,聽落好吸引呀何?兩日一夜嘅旅程,盛惠每位70蚊美金,奈可我同賴屎哥都比較窮,我哋決定留守係市區,盡量有幾慳得幾慳!住宿方便雖然佢哋去左國家公園,但係床位照留,我哋兩人獨享4人間都咪話唔爽,可以赤條條周屋走。
住果度係可以幫我哋買去Irkutsk 嘅火車飛,不過會有Service Charge 係入面( Around HKD 100),問完詳細資料後緊係衝去火車站買喇!鬼叫窮咩!係網上搵嘅資料大約17萬蒙古幣,國際車飛係二樓,國內就係一樓。係換緊錢個陣有個非常靚仔嘅鬼佬比佢個司機帶左黎車站,佢一面無奈完全唔知發生咩事,諗住我哋會識蒙古話可以幫到佢,Sorry can’t help 我哋係呢度都自身難保! 可能係想要多啲錢掛! 究竟佢當初點搵佢做司機㗎!
售票處下面好多人,上面影都無隻。同行嘅紙筆哥再次展現佢抄寫嘅能力,一早已經Google Translate 曬啲地方同基本語言嘅蒙古文同俄文,到時候扔本野出黎再加啲身體語言就暢通無阻,賣飛果個人睇完本野,又指下個日歷再加啲身體語言,價錢仲要平過我哋預測,只需14萬蒙古幣,下鋪對我黎講非常重要,今次畫埋公仔指定要4條友一卡,兩上兩下!唔駛5分鐘已經Mission Completed!
呢邊日照去到8-9點先天黑,啲時間好似好多咁!蒙古係唔需要Uber,因為全民都係Taxi,你舉手就會有車坐,非常海鮮價,呢度更加係 Toyota Prius嘅天下,車價只係需要2萬5,呢邊買車完全唔駛比稅!夢寐以求嘅G Class G55 AMG版都係26萬,媽呀會唔會平得太過份。
呢邊車多過人,食住新鮮嘅廢氣打的去Naran Tuul,一個超級大嘅乾貨市場,衫褲鞋襪,細至做衫嘅布大至家居用品,應有盡有!傍晚時候大部份排檔都開始收工返歸。日照嘅時間實在太長,可以再轉戰第成吉思汗廣場,個度得個大字,好多細佬係個度玩,大人係度Hea!無乜野做5分鐘就可以行完嘅景點!
紙筆哥係我哋成團唯一一個係Hostel 以外可以上網嘅人。所有地圖嘅野都要靠佢指示,由廣場行返我哋 Hostel 只係一條大直路,大約10分鐘嘅路程就可以返到去!無意中發現紙筆哥26號生日,但當時已經太晏,賣蛋糕嘅地方都收曬鋪,唯有轉戰Coffee Shop 食個Waffle扮Cake Celebrate. Happy Birthday to you!
蒙古都幾多外國人黎,閒閒地都會留係度個幾月,究竟有咩咁吸引?呢度嘅天氣又熱,又乾燥,首都食廢氣簡值一流。我對呢度嘅感覺非常一般,對我黎講只係一個中轉站!