• 季節
  • 主題深度遊
  • 天數5-8天
  • 人数個人
  • 文章性質交通攻略
  • 人均消費6000以下
可能因為僅僅獨立左20年,網上對關於斯洛伐克既旅遊資訊並不多, 特別是中文,更特別是香港!最多只有數篇首都布拉迪斯拉發(Bratislava)的遊記
而小子早前偶爾於此國盲目獨行7日,經盡滄桑撞盡大板,故寫下此總覽,望能對各位有意暢遊此別具風韻東歐小國的旅行者有所幫助!
(以下價錢全以港幣計算)
===============================================
衣:
斯洛伐克大多都係山區城市,早晚溫差大,外套,行山鞋,太陽眼鏡……都係呢d唔多講啦!
食:
由於斯洛伐克生活指數底,係不錯既餐廳食飯基本上你有$100港幣就可以做大豪客,由湯到main course到甜品到飲品齊哂!
而且呢度普遍係無加一無tax or其他service charge,所以可以叫得好放心!但首先要有小林尊個胃,因為呢度碟頭都普遍偏大的,不過一場嚟到,無理由唔試多幾樣ga~
一般餐廳都有English menu所以唔使擔心點菜方面,要擔心既應該係味道…….雖然又大又平,但唔知係咪我黑仔,呢7日真係無乜食過好味既……又或者斯洛伐克較窮,對烹飪的要求不高
如果想試斯洛伐克既傳統美食,最出名既叫做唔知咩名,係一種炒薯仔粉團,多用酸椰菜+臘肉油脂 or 芝士忌廉+臘肉油脂嚟煮,女士們基本上食一啖要跑3日步抵消,男士我就覺得一試無妨,但味道特別,唔係個個接受到,我自己就覺ok ge。另外唔怕口氣既我推薦Garlic soup,真的不錯!
飲品方面仍以捷克啤酒為主,而且酒平過汽水,啤酒500ml $12,汽水200ml $15,好難唔飲ga wor!另外有種叫Kofola既可樂類汽水,比起Coke較少汽無咁甜有些少雲呢嗱同草藥味,有draft,值得一試,約300ml $6 in酒吧
住:
 住方面普遍都比西歐略平,由我只係去過4個地方所以只講下these 4
1. Bratislava – 建議貴dd都好都要住返舊城區,因為其他地方要成日行上落斜好麻煩,地圖睇落好近既地方其實係好遠的!而且d交通超亂d人又唔識英文,舊城區起碼係交通樞紐方便好多,而且夜晚左近一定有野食先
2. Banska Stiavnica – 鎮上少數既hostel ” Hostel 6″係唔錯既選擇,乾淨,有home feel,最重要沖涼熱水夠勁! 床位$110至$120一晚
3. Zdiar – 基本上去得就一定係住”Ginger Monkey Hostel”! 佢地係鎮上唯一真係識英文既地方,地方雖舊但乾淨而富有特色,管理人熱情好客,床位$120一晚
4. Kosice – 於網上無乜好評價既hostel,我住既”Colosseo Residence” apartment算係又平又靚,火車站行去識行既唔使15分鐘,對面已經係舊城區,周圍有好味餐廳,複式獨立二人房有埋廚房$320一晚,可以一戰!
行:
去斯洛伐克既方法,不外乎都係一般飛機巴士火車,呢d大多歐洲國家都有直達至Bratislava或Kosice。
另外從布拉格,維也納都有高速船沿多瑙河直到Bratislava(布達佩斯好似都有但唔太肯定),我自己就由維也納出發,$200,一小時45分鐘到達,仲可以睇埋多瑙河日落,我覺得是成功的例子!
當然以上你都唔鐘意既,係可以選擇行路過去,又或你擁有三文魚level既游泳能力,都可以一試逆流多瑙河而上既,都係幾廿K至幾百K je
一般市內交通方面,既然最大兩個城市都無地鐵,其他都係唔好奢望咁多啦。而單車用途不大,因為太多山坡同爛路,所以最主要都係Tram,巴士同11號車。短途約$7一程,同其他歐洲國家一樣於候車站買票上車打卡,但同捷克一樣未必個個車站會有售票機,如果真係無既話…….又係測試你運氣既時候啦~
留意以上係兩大主城既情況!一般山區除左隔好耐一班既大巴外係可以完全無交通ga!所以一定要記得係車站睇清楚同識睇回程車係幾點!不過講真……..張 timetable難睇之餘仲要成日比人撕走左……所以多數都係等寂寞到夜深………
至於的士我無坐過,留待其他網友發掘啦!
城鎮之間既交通,以火車同長途巴士autobus為主。火車站買飛要自己去個水牌睇班次,但係超級複雜真係好難明!Autobus就相對易十倍,但最住方法都係用呢個website :
(順帶一題,捷克有一個相同網頁可以check交通 : http://jizdnirady.idnes.cz/vlakyautobusymhdvse/spojeni/
雖然係斯洛伐克文而且Google都翻譯唔到(聽聞有英文版但我搵唔到),但只要打上出發地目的地同大約時間,就會show所有既資料包括坐咩車轉咩車,時間地點,需時幾耐幾錢等等,而且由於斯洛伐克既交通工具準時程度極高(個人覺得同德國有得fight,咁當然未到日本咁痴線啦),所以呢個web對當地人同背包客都非常重要!
至於購票,車站售票員大多都懂簡單英語,但未必聽得明你講既英語!
個人建議可用紙仔或手機先寫低目的地再比佢睇,呢樣真係好重要!山區d上車購票既巴士司機大多係中年人,真係yes no都唔識ga!而且d地名好多都太似!差之毫釐謬之千里,真係會車左你唔知去邊ga!
仲有樣古怪事,呢度火車飛係來回平過單程ga!!!!!!!!!!!!!!!!!!
即係我話要單程去匈牙利布達佩斯,$400,來回呢?$200
呢個咩經濟學理論嚟ga???????????
連賣飛比我既阿姐都話本地人都覺此事奇怪,外國網站都有提及此事,但我唔肯定係咪所有車票都係咁,買之前最好都係問一問
玩樂:
去得斯洛伐克,最主要都係睇未開發既純自然風景,Tatra National Park 果d更加係行山愛好者既天堂!
如果鐘意睇正式洞穴,斯洛伐克全國有十幾個大型鐘乳洞,當中有一個係boat trip兩個係冰洞,詳細開放時間可以睇呢個網頁 http://www.ssj.sk/?lang=en ,注意每個洞都有人數,時間或時期限制的。
另外不可錯過既當然係日落日出!不論係多瑙河定山上定草原,你都一定會愛上佢,講一聲you are beautiful,it’s true!
如果係冬天去既話仲可以滑雪tim!
不過我去到時係秋天,乜都唔做純粹享受綠草黃葉的原野小鎮風情也不俗吧~
 
風俗:
一般嚟講夜晚8點打後就死城一樣ga la!但都仲有部份餐廳仍然營業,唔怕羞開門入去問下就得ga la! 但到10點後真係好有Bio Hazard感覺……..
另外正如上文所講,一般斯洛伐克人都係完全唔識英文既!部份後生under 30有機會識少少,40以上都係算吧啦……但普遍都係友善同樂於助人的,民風較純樸,如果同你溝通到既會更加熱情!
此外斯洛伐克美女眾多,質素之高同多係隨便係街捉一個都可以贏香港小姐!(定係我地香港既小姐太………….)於是係街上友善地向美女行注目禮都可以係旅遊重點之一~我知有相有真相,但我真係無~總之so far呢個都係一個安全既國家!
====================================================
打左好多字!多謝你咁有耐性睇到呢度~希望呢篇文章幫到手啦!
旅程節錄可以睇返我之前既遊記~

有咩問題意見或出錯既,歡迎留言指教~

=========================================

承蒙Fongala邀請,能在此分享小弟一些被遺忘被忽視的精選舊文章,實在喜不自勝。
是次回帶的主要是一d無人為意的隱世風景或special moment,寫時比足心機但因宣傳不足最後乏人問津,所以希望借呢個機會比個2nd life呢批可憐既文字相片啦~
另外小弟的文章會同時刊於UBlog、 DC Fever Travel、 Blogspot 及遊牧爆谷
請各位多多支持呀!!!!!!!!!!!!!!


Email : funggarcia@gmail.com
 
 
ging