• 季節
  • 主題深度遊
  • 天數9天及以上
  • 人数個人
  • 文章性質遊記
  • 人均消費6000-16000

對我黎講,威尼斯主島既重點有幾個,全部都係中學睇紀錄片見到已經好想去既地方  果時套紀錄片係 Francesco’s Venice,佢另外仲有環意之旅,不過睇完既印象就無威尼斯咁深刻

今日最主要想睇亦係黎到我覺得一定要睇既係:

里阿爾托橋 Ponte di Rialto (網上圖片)

聖馬可廣場一帶建築 Piazza San Marco (網上圖片)

特別係總督宮

(點解佢地天氣咁好 )

嘆息橋

點解特別鐘意呢幾個地方,嘆息橋就可能因為覺得好有故事,其他應該係無原因 係不明來歷既威尼斯情意結 

呢D地方全部都要行一輪先會到既,如果由巴士站起行,要 30 分鐘。其實都可以搭船直達既,不過因為威尼斯每一條路都係可以影十萬張相既,所以當然慢慢行過去啦 (連餐廳都bookmark左,確保順路)

出發

一起身望出窗見到個天是白色的  但都無損(其實損左2%)我踏足dream place既心情 但今日既相就真係好黯淡。 

由Mestre去威尼斯主島係會經過一條好長既直路,上面有火車、people mover(似電車)同汽車既路,巴士一上呢條路我已經好興奮 

如果搭巴士前往,會先到Pizzale Roma 羅馬廣場,落車無咩特別,買船票/pass既地方就係附近,因為今日唔預會搭船,一野skip左

去睇景先啦 

第一條會見到既係Ponte di Calatrava 憲法橋,我個人麻麻呢條橋,

因為個外觀同呢度太違和

一過左佢,就見返D靚野啦 

赤足橋 Ponte degli Scalzi 

呢日我全日既心情都係:  

威尼斯既橋多不勝數,但跨越大運河既橋其實只有四條,

而上面呢兩條已經係其中兩條 所以要陸路過對面島,係咁大個主島只有四個機會,其中兩條仲放埋一齊,miss左就有排行先到另一條 

之前有人同我講過威尼斯條河係臭既,我又唔多覺

係D牆比我想像中多噴畫

呢個露天茶座似坐監多d 

唔知係咪唔係旺季呢,四圍人唔多,都可能係集中曬係D景點度

基本上我地都係向住要去既方向見路就行,

剩係有時用google map睇下有無走過龍,

所以行既都係d不知名小巷仔,不過完全唔覺危險

隔入左當地既burgerking 

間中有d船駛過,gondola呢頭反而就比較少

有時會有d不知名廣場仔咁

當地小朋友

呢頭係我地午餐既地方

基本上我地今次無話特登搵D top既黎入,主要係順路而見係意粉就食

越地道越好

間野叫 Ristorante Al Bagolo,係味道同價錢都唔錯既餐廳。

去到果時好似得我地  可能因為呢頭唔旺。

我地叫左個Lasagna同 Carbonara。

好得意,佢一上菜已經覺得同平時其他地方叫開既唔同樣 

食落都係唔係平時食開既味   好似蛋味重D。

好特別,口味都特別重,同埋係另一種好味 

之後我地接住食果D pasta都係,

全部都係特別既味,同平時食開既果種sauce既味係唔同,

係意大利食果然會唔同d 

每碟pasta 10-12歐左右,但埋單既時候就多左幾歐 寫住果幾歐係Coperto 。有點疑惑,上網睇完get到既係類似茶位咁,不過佢地係麵包位 每人2-3.5歐不等,間間唔同,都有D係唔收既,搞到每次入餐廳食野埋單都好緊張,唔知今次又被人收幾多

(想肯定d既都可以入前問定有無coperto既,但硬係怪怪地咁 )

食飽出返去繼續行 

出去後,我地就朝住里阿爾托橋 Ponte di Rialto 既方向去,途中會經過一間叫TIM既意大利電訊公司,咁本新係想去果度買sim card,上官網睇中左個好似價位幾正常既plan ,點知一去到問佢,佢就話佢呢度無呢個plan既card買,伏 得返D一次過比成5GB定10GB你既plan,又貴,所以我地都唔買了,繼續局住食Lebara 搶錢plan 所以我成日強烈建議係香港買定sim card先去,我未試過係歐洲成功買到張唔伏既sim card,係三個國家分別試左三次 

因為近景點,終於多返D人氣。

仲見到個幾靚既影相位,本新無人既,我地就行去影啦,點知之後就幾個人係度排隊影

企足全日唔知有無人理佢

做乜

近景點區,開始多返D gondola,我覺得坐gondola 一定要睇定D先上,有D睇落靚好多,有D好頹,但價錢都係一樣。呢個係幾靚既

本來係venice坐gondola其實係我一定要做既野黎,

簡直係夢想黎,一早都預左要比100歐(一架船)左右搭下,

不過因為天氣兩日都差,咁差都搭實在太無feel 仲有蝕錢既感覺

於是都係留返將來(第二次黎第二日天氣好但因為無時間要趕車,所以剩係短短地行下算,我諗幾年後我會再返黎既

越黎越近里阿爾托橋,有個廣場仔咁。

24小時時鐘

四圍都超多手信店~

係呢度我見到差唔多到橋頭,開始緊張

點知

左邊 圍板 條橋整緊…

勁失望


紙板仲要撻左個廣告係面
真面目都見唔到,將來一定要再黎啦

呢條橋特別既位係橋既兩側都係商店,一路行上橋一路都有野睇下,
都不外乎係磁石、玻璃果D
橋既兩端既河畔其實幾好景既

好熱鬧 我諗我太城市人,都係鐘意多人既氣氛
我會覺得好有生氣

不過係下面好多柱,影唔到相

遠睇…條橋…都呃到下人呀

見唔見到隻契弟企係木柱上面

天色真係好差

感覺好唔精神

影完一輪相,J多陣個景後,我地就去蝸牛府,佢係橋尾同聖馬可廣場中間,好順路

佢其實係一座小型宮殿,呢個轉轉轉既樓梯外型特別,所以都係個景點黎,

我之前做research話無得上,但去到見到D人係上面上上落落,所以應該係上得既,而作為廢柴既我地見到樓梯仲要咁多層,就當然無上去 剩係係外面影相望下就走,要係外面個圍欄外影

比起呢個府,我覺得途中見到既呢個屋仔仲特別

D窗排位好不規則,外牆又無啦啦有舊凸出黎,好想入去參觀下

gondola gondola,果個櫥窗既display方式幾得意

水泄不通

成堆,另外我覺得gondola d船夫比我想像中hea,傳說中佢地會一路划一路唱歌,但我地見到既係十架可能得一兩架有,其他都好似死老豆既樣咁划,有D玩住手機划,毫無服務

呢度咁旺,因為好近最大既景點,聖馬可廣場

聖馬可廣場 又要講句,天氣差到爆。

今日應該唔算好多人?

雖然唔好天,但都好彩無落大雨或者潮漲,

見到D潮漲果D遊記,成地水要搭曬木頭咁有D論盡咁

仲好唔美觀

好多契弟

威尼斯標誌之一 聖馬可鐘樓

記得果時睇個紀錄片話呢個鐘樓之前被人燒完再建,之後仲突然成個散左咁倒塌,而家眼前呢個係經過多次重建既,據聞第一個version 係係第9世紀已經存在 。

呢個鐘樓係可以登頂既,睇到成個威尼斯既高空景,應該幾靚,但網上講既一致話地面睇靚D,我地呢D行到呢度已經攰死既人就無排隊上。

遠處果兩條大柱聽聞以前係用黎行死刑既柱黎,有點不祥,所以傳說當地人係唔會係果兩條柱之間行走,唔知真定假呢哈哈,當然當日所見就係好多遊客係果度穿梭啦。我聯想起中大圖書館出面果個仲門。

廣場上面好多露天cafe,呢個景緻都係一種好歐洲風情既感覺。

呢度其中一間仲有live band 定 orchestra,所以一路都有D音樂,好似幫個景配音咁

不過根據經驗,set得係廣場既cafe餐廳都係做遊客既一次性不回頭生意,比較難食同伏 係馬德里、尼斯、Brugge 就中過伏,當中馬德里果間最伏。

威尼斯聖馬可大教堂,出面超多人排隊,不過都係果句,教堂已經睇到厭曬,所以都無入去既意慾。

睇台妹遊記話入場免費,入面唔可以揹背囊,唔可以著短裙,仲有方法避開條隊(去寄存背囊,之後係門口直接將寄存行李果個牌仔比門口職員睇就可以直接入到去,聽講因為有D人係排完先知要寄背囊,咁就會寄完再返黎比張牌佢睇然後入場,所以門口職員會assume所有比張牌佢睇既人都係排過隊既。)

雖然無入場,但呢座教堂外面真係幾靚同宏偉 ,個門一層層咁,仲有好多靚畫,D石都好靚,彩色雲石咁。同其他城市既教堂風格係幾唔同下。

真係好多色彩,係幾靚的

佢隔離有個鐘樓仔,聖馬可時鐘塔,係早期文藝復興既產物黎,所以有逾五個世紀既歷史。我覺得最特別係佢下面果個拱門通道入條街仔既景觀。

總督宮 Doges’ Palace

呢個係今次我黎到聖馬廣場唯一決定左一定要入既建築

原因除左覺得佢外型好靚,好想入去睇下 仲有最主要係入去參觀就可以係嘆息橋入面行,咁今次威尼斯之行就可以睇到曬佢既內外 。

所以我都一早網上買左入場票,12.5 歐,佢係套票黎,仲包埋考古學博物館,但我地就無去,剩係睇左總督宮,因為其他果D唔係我地主打既野,同埋無咩時間 再加埋已經行厭埋博物館

好特別 雖然好大舊,但非常有美感

另外,聽聞LV好標誌性既皮袋上既圖案係參考左呢個建築上面既窗口(十字果D花)。

廣場對出既就係海景啦 

呢度應該係gondola業最旺既地方啦,好多個碼頭。

超多人

向總督宮既左邊行就係好著名既嘆息橋

圖中呢個橋中間位置可以影到嘆息橋,所以長期勁多人。

嘆息橋 Ponte dei Sospiri

望落好似一個拱形牌,但其實佢係橋黎。

嘆息橋個名同佢自身既故事都好有意境,呢條橋係密封式拱橋,連接住威尼斯既法院同監獄,係死囚走向死亡既通道,死囚被帶去行刑前會經過呢條橋,橋上面有好細小既窗口,死囚可以係離開人世前最後一次透過呢個窗仔望下外面既世界,嘆息橋既命名完全帶出左死囚走過呢條橋時,最後一次望下呢個世界,感嘆生命即將走到終點既意境。 

雖然好多人係度影,但個個都係影完就走,所以要影到好既角度其實都唔難
接住就入總督宮啦

(續)

【歐遊百幾日遊記】意大利(北部)篇 (二)威尼斯 主島必看景點、徒步行主島攻略 (下)參觀總督宮 進入嘆息橋

歡迎 Like Facebook Page 緊貼最新既遊記及攻略 : 芒果豆腐花遊記