• 季節
  • 主題
  • 天數
  • 人数
  • 文章性質
  • 人均消費

今次想介紹嘅係日本一間連鎖拉麵店,叫做天下一品,以我所知,唔同地區同時間係會有特別嘅菜單,所以今次會以我唯一一次食過嘅經驗黎介紹。如果有朋友食過唔同嘅特別菜色,可以留言話我知,呢一次係17年12月去名古屋食嘅第一餐

我仲記得當日去到酒店,整頓好已經成十點幾十一點,雖然本身已經作左食便利店嘅打算,但係Google睇一睇,原來有D連鎖餐廳係開到十二點甚至更夜,最後就揀左天下一品,一黎想食拉麵,二黎從未食過呢間,都算一直想試試

老實講,我本身期待就唔大嘅,因為始終對連鎖店有少少偏見,唔係話唔中意食連鎖,但唔會帶住好期待嘅心情去食,其實都未嘗唔係一件好事,因為無期望就無失望,用平常「口」去試試佢

入到去,格局都有少少似家庭式餐廳。店員帶完位之後就睇下餐牌,經過一番深思熟慮同商討之後就叫左成枱野,上枱嘅時候已經就黎12點,除左每人一碗拉麵,仲叫左燒牛肉蓋飯(套餐包埋拉麵),青蔥鹽味炸雞同埋餃子

先集中講拉麵,以我睇佢餐單同睇網上資訊所得出天下一品嘅特色係可選擇嘅湯底,最主要嘅三款係,こってり(濃厚)/あっさり(清淡)/屋台。前兩樣從字面上都明白,而屋台味就係兩者嘅平衡,屋台即係日式大排檔,比較出名嘅應該都係福岡天神一帶。九州就出名豬骨湯底,而天下一品嘅湯底就係用雞骨同蔬菜而煮成,雖然我地兩碗都係濃厚未能夠同大家介紹其他味,但我都想推介呢款濃濃嘅湯,唔知係咪因為用左雞骨,濃得黎亦唔會好肥膩,至於麵/叉燒/配料方面,印象唔太深刻,但記得係合格 (隔得太耐先打文係咁)

ローストビーフ丼=燒牛肉飯,未至於好好食,你當係去吉野家食個牛肉飯咁,只不過係燒牛肉,但基於我想食日本嘅燒牛肉想左好耐,係有私心加分,面頭個汁酸酸地都幾開口

餃子同炸雞,餃子比起香港一般食到嘅味道就好少少,細細隻似「一口餃子」,有齊餃子汁同辣油,合格。炸雞就揀左清D嘅青蔥鹽味,一大堆嘅蔥配上鹽同胡椒,清新得黎又幾夾炸雞嘅肉味

整體而言,味道可以話係中上,未去到非試不可,但絕對係值得一試,非常滿足嘅一餐。雖然以拉麵店嘅角度黎睇,佢提供嘅食物種類可能係雜左少少,但以連鎖店嘅角度睇,算係中規中矩,恰到好處。除左以上提及過嘅食物,其實飯麵都仲有唔少變化,例如炒飯/牛丼,拉麵亦可以有唔同嘅自訂配料,甚至係幾款組合埋嘅定食,再加入唔同店舖唔同時間會有限定嘅菜式。相信如果你係第一次去嘅話,應該都會用左唔少時間係睇餐牌度

IG: @kwanjaieatallday