• 季節四季皆宜
  • 主題食玩
  • 天數1-4天
  • 人数幾個朋友
  • 文章性質食玩攻略
  • 人均消費逐個項目分享

味玉そば(醤油) (醬油味玉拉麵)¥950
肉めし (肉飯)¥200

金色不如歸呢個名,聽就聽左好耐下,拎過幾次米芝蓮推介,但一直都未有機會嘗試。咁啱今次去正正就係臨搬嘅時間,趕得切試到本店都算好彩。 呢間金剛小儀都介紹過嘅拉麵店就係喺中野嘅附近,幡谷。開鋪前已經有條人龍,大約十個人,由到達至到有得食,大約係四十五分鐘左右。

一上枱,湯底有如金色,表面有一層薄薄嘅油,配上唔同嘅肉同筍,相當吸引。先飲一啖湯,醬油味濃得黎唔會過火,同時有一種鮮味,應該就係黎自呢間鋪最出名嘅湯底材料:貝類。

無獨有偶,肉同筍都係各有兩款,肉面頭加左少少菌類嘅油,感覺有啲似另一間米芝蓮拉麵店「蔦」採用左松露咁,非常香,對我呢個菌類愛好者簡直係正中下懷。筍就唔似我曾經係其他出名嘅拉麵店食到嘅咁厚,但味道方面絕對係高水平,唔會失望。味玉亦係水準之作,回味無窮。麵亦食得出絕非一般貨色,成碗麵整體黎講就係用料上乘,各方面都食得出誠意同埋水準,攞得米芝蓮推介果然係好野。

唯一失望嘅就係個飯,肉較乾身,成碗食落感覺較頹,呢樣就真係唔推薦大家食。

另一樣想提嘅就係店家嘅上碟擺設,每當一位客人離開,清潔好,下一位客人坐低就會放定一隻碟係枱面高一級嘅位置,準備放碗麵。雖然唔係啲咩特別野,但由師傅煮麵,「set」好碗麵,去到擺上個隻碟俾客人品嚐,都體現到一種店家想將最好嘅野呈現係客人面前嘅精神。
做好一碗麵,難;做好一間拉麵店,更難;做好一位職人,最難。
希望新店可以保持到水準,甚至更進一步。

新店地址:東京都新宿区新宿2-4-1 第22宮廷マンション 1F
營業時間:[二至四] 11:30~15:00 18:30~21:30 [日] 11:30~15:00